හිටපු විනිසුරු සී. වී. විග්නේශ්වරන් උතුරු පළාතේ නව මහ ඇමැති ලෙස ජනාධිපති ඉදිරියේ දිව්රුම් දීමට යන බව අපි මෙයට දෙදිනකට පෙර දැන ගතිමු.
උතුරු පළාතේ නූතන ආණ්‌ඩුකාරයා විශ්‍රාමික මේජර් ජෙනරාල් ජී. ඒ. චන්ද්‍රසිරි ය. ඔහු ඉදිරිපිට දිව්රුම් දීම ප්‍රතික්‍ෂේප කිරීමෙන් විග්නේශ්වරන් දෙන පණිවුඩය කුමක්‌ද...? තමන් (ඇතුළු රැළ) උතුරු පළාත් පාලන ඒකකය පිළිගන්නේ නැති බව ය. සමහර විට විග්නේශ්වරන්ගේ අරමුණ විය හැක්‌කේ හිටපු හමුදා නිලධාරියකු ඉදිරිපිට දිව්රුම් දීමෙන් වැළකී සිටීම ය. එසේ නම් විග්නේශ්වරන් මහ ඇමැති තනතුර සඳහා පළාත් සභා ඡන්දයට ඉදිරිපත් වීමත් වැරදි ය. ඔහු ආණ්‌ඩුවේ හිටපු විනිශ්චයකාරවරයෙකි. ඔහු අයත් වූ අධිකරණ පද්ධතිය විසින් එල්.ටී.ටී.ඊ. කාරයන් විශාල ප්‍රමාණයක්‌ හිරගෙට යවනු ලැබ ඇත. විග්නේශ්වරන් තම ජාතියට ලැදි ඉතාම පිරිසිදු මිනිසකු නම් පළමු කොටියා හිරේ යන විටම අධිකරණ පද්ධතියෙන් ඉල්ලා අස්‌විය යුතු ය. එහෙත් විශ්‍රාම යනතුරුම විග්නේශ්වරන් ඒ ගැන කිසිදු ආකාරයකින් උනන්දු වූයේ නැත. දැන් විතරක්‌ මොකද මේ අමුතු තදියම·
මහින්ද රාජපක්‍ෂ මහතා මුළු රටටම ජනාධිපති ය. විග්නේශ්වරන්ගේ දිව්රුමට යාපනයට යනවාද, නැත්නම් විග්නේශ්වරන් කොළඹට ගෙන්වා දිව්රවනවාද, එහෙමත් නැත්නම් ආණ්‌ඩුකාර චන්ද්‍රසිරි ඉදිරිපිටදී දිව්රීම සිදුකරනවාද යන්න එතුමාගේ අභිමතයකි. යම් හෙයකින් ජනාධිපතිතුමා ඉදිරිපිටම තමා දිව්රුම් දිය යුතු යෑයි විග්නේශ්වරන් කියා සිට ආණ්‌ඩුකාර චන්ද්‍රසිරි ඉදිරිපිට නොදිව්රුවහොත් ක්‍ෂණික ගැටලුවක්‌ හටගනී. එනම් නිසි දිව්රුමකින් තොරව පළාත් සභාවක ක්‍රියාත්මකභාවය පටන් ගැනීමට බැරි වීමයි. එවිට මධ්‍යම ආණ්‌ඩුවට ආපසු උතුරේ සම්පූර්ණ පාලනය භාර ගැනීමට සිදුවේ. මෙය අලුත් අර්බුදයක පටන් ගැන්මයි. මෙය දෙමළ සන්ධානයේ අනුදැනුම මත පටන් ගන්නා අර්බුදයකි. ලංකා ආණ්‌ඩුවට වැළැක්‌වීමට නොහැකි අර්බුදයකි. දෙමළ සන්ධානය ගිය තැන වන කර ගන්නා බවට මීට වඩා සාක්‍ෂි කුමටද? කෙසේ වුවද ඉදිරියේදී සියලු ඡේ. පී. ලාත් ජනාධිපතිතුමා ඉදිරියේ දිව්රීමට ඉල්ලුවොත් පුදුම නොවන්න!
0 comments:
Post a Comment